JPMorgan-ი თაღლითობაში მსჯავრდებული სტარტაპის დამფუძნებლის 142-მილიონიანი იურიდიული ხარჯების გადახდაზე უარს ამბობს

ფინანსური გიგანტი JPMorgan Chase-ი სასამართლოს გადაწყვეტილების გაუქმებას ითხოვს, რომელიც ბანკს სტარტაპ Frank-ის დამფუძნებლის, ჩარლი ჯევისისა და მისი მარკეტინგის დირექტორის, ოლივიე ამარის, იურიდიული ხარჯების დაფარვას ავალდებულებს. The Wall Street Journal-ის ინფორმაციით, საუბარია 142 მილიონი დოლარის ოდენობის ანგარიშზე, რომელიც ბანკმა თაღლითობისთვის მსჯავრდებული ყოფილი პარტნიორების დასაცავად უნდა გადაიხადოს.

JPMorgan-მა სტარტაპი Frank-ი 2021 წელს 175 მილიონ დოლარად შეიძინა. თუმცა, მიმდინარე წლის დასაწყისში, ჯევისი და ამარი დამნაშავედ ცნეს ბანკის მოტყუებაში. გამოძიებამ დაადგინა, რომ მათ Frank-ის მომხმარებელთა რაოდენობა ხელოვნურად გაზარდეს, რათა კომპანიის ღირებულება გაედიდებინათ. ამ დანაშაულისთვის ჯევისს შვიდი წლით თავისუფლების აღკვეთა მიესაჯა.

JPMorgan-ის წარმომადგენელი ადვოკატის, მაიკლ პიტინგერის თქმით, ჯევისის იურიდიული გუნდის მიერ წარდგენილი ხარჯები „უკიდურესი დარღვევების“ ნათელი მაგალითია. მისი განცხადებით, ანგარიშებში შეტანილია ისეთი პუნქტები, როგორიცაა ძვირადღირებული სასტუმროს ნომრების დაჯავშნა, ერთი დღის განმავლობაში 24-საათიანი სამუშაოს აღრიცხვა და „ცელულიტის კარაქის“ (დამატენიანებელი კრემი) შეძენაც კი.

„ჩემი ცოდნით, არასდროს ყოფილა საქმე ასეთი აშკარა ბოროტად გამოყენების ფაქტებით“, — განაცხადა პიტინგერმა. თავის მხრივ, ჯევისის წარმომადგენელმა WSJ-სთან საუბარში აღნიშნა, რომ მისი დაცვის ქვეშ მყოფი JPMorgan-ის პოლიტიკას ზედმიწევნით იცავდა და „არცერთი ხარჯი პირადად არ დაურიცხავს და არც უნახავს“.

„როგორც თანამშრომელმა, მან შეიძინა ნაყინი და სხვა ნივთები JPMorgan-ის ქცევის კოდექსის შესაბამისად და არასდროს მოუთხოვია იმ ხარჯის ანაზღაურება, რომელიც მისთვის მიცემული მითითებებით პირდაპირ არ იყო ნებადართული“, — განაცხადა ჯევისის წარმომადგენელმა.