კიმ კარდაშიანი ChatGPT-ს „მტრინატორს“ უწოდებს და გამოცდებში ჩაჭრას აბრალებს

Vanity Fair-თან ინტერვიუში კიმ კარდაშიანმა, რომელიც იურისტის პროფესიის დაუფლებას ცდილობს, ChatGPT-სთან თავის „ტოქსიკურ“ მეგობრობაზე ისაუბრა. მან აღიარა, რომ ხელოვნური ინტელექტის მიერ მოწოდებული მცდარი ინფორმაციის გამო იურიდიულ გამოცდებში ჩაიჭრა.

„მე მას [ChatGPT-ს] იურიდიული რჩევებისთვის ვიყენებ. როდესაც კითხვაზე პასუხი მჭირდება, ფოტოს ვუღებ, ვტვირთავ და ვეკითხები“, — განაცხადა კარდაშიანმა. „პასუხები ყოველთვის არასწორია. ამის გამო გამოცდები ჩავაგდე... მერე ვბრაზდები, ვუყვირი და ვეუბნები: „შენს გამო ჩავიჭერი!““

ChatGPT მიდრეკილია „ჰალუცინაციებისკენ“, რაც ნიშნავს, რომ ენობრივი მოდელი ზოგჯერ თავად იგონებს პასუხებს, იმის ნაცვლად, რომ აღიაროს, რომ კითხვაზე ზუსტი პასუხი არ აქვს. ეს ტექნოლოგია არ არის დაპროგრამებული იმისთვის, რომ „სწორი“ ინფორმაცია გაარჩიოს; ის უზარმაზარ მონაცემთა ბაზაზეა გაწვრთნილი და ცდილობს, შეკითხვის საპასუხოდ ყველაზე სავარაუდო ტექსტი იწინასწარმეტყველოს, რომელიც შეიძლება ფაქტობრივად მცდარი აღმოჩნდეს.

ზოგიერთი იურისტი სანქციების წინაშეც კი აღმოჩნდა ChatGPT-ის გამოყენების გამო იურიდიული დოკუმენტების შედგენისას. ეს ფაქტი ადვილად შესამჩნევი ხდება, რადგან ხელოვნური ინტელექტი ხშირად არარსებულ სასამართლო საქმეებს იმოწმებს.

კარდაშიანმა აღნიშნა, რომ როდესაც ChatGPT იმედს უცრუებს, ის მის ემოციებზე ზემოქმედებას ცდილობს, თუმცა ეს უშედეგოა, რადგან ხელოვნურ ინტელექტს გრძნობები არ გააჩნია. „ვეკითხები: „ჰეი, შენ ჩემს ჩაჭრას აპირებ, რას გრძნობ იმასთან დაკავშირებით, რომ ეს პასუხები ზუსტად უნდა იცოდე?““ — ამბობს ის.

მისი თქმით, ამ კითხვაზე ChatGPT პასუხობს: „ეს უბრალოდ გასწავლით, რომ საკუთარ ინსტინქტებს ენდოთ“. კარდაშიანმა დაამატა, რომ მიუხედავად იმისა, რომ ChatGPT-ს გრძნობები არ აქვს, ადამიანებს მის მიმართ ემოციები უჩნდებათ. „ამ პასუხებს სულ ვასქრინებ და მეგობრებს ვუგზავნი ჩატში წარწერით: „წარმოგიდგენიათ, ეს ძუკნა ასე როგორ მელაპარაკება?““