Legato-ს დებიუტი: სტარტაპმა $12 მილიონი მოიზიდა და ხელოვნური ინტელექტის მქონე სმენის სათვალეები წარადგინა

აშშ-ში სმენის დაქვეითება დაახლოებით 50 მილიონ ზრდასრულ ადამიანს აწუხებს, თუმცა დიაგნოზის მქონე პირთა მხოლოდ 20% მიმართავს მკურნალობას. ახალი ტექნოლოგიური სტარტაპი Legato სწორედ ამ პრობლემის მოგვარებას ისახავს მიზნად. კომპანიამ ოფიციალურად დაასრულა ფარულ რეჟიმში მუშაობა, 12 მილიონი დოლარის ოდენობის ინვესტიცია მოიზიდა და საზოგადოებას ხელოვნური ინტელექტის მქონე სმენის სათვალეების პირველი პროტოტიპი გააცნო.

სათვალეები, სახელწოდებით Legato Frames, კომპანიის მიერ დაპატენტებულ სმენის დამხმარე ტექნოლოგიას უშუალოდ ჩარჩოს გვერდითა ნაწილებში (ე.წ. „დუჟკებში“) აერთიანებს. პროდუქტის ბაზარზე გატანა მიმდინარე წლის შემოდგომაზე იგეგმება.

Legato-ს დამფუძნებლები, მეჰულ ტრივედი და სტივ რომინი, სმენის აპარატებისა და ტარებადი მოწყობილობების სფეროში დიდ გამოცდილებას ფლობენ. ისინი წლების განმავლობაში Bose-ში მუშაობდნენ, სადაც ტრივედი Bose Frames-ის შექმნას ხელმძღვანელობდა, რომინი კი სმენის აპარატების განყოფილებას მართავდა. მოგვიანებით ტრივედი EssilorLuxottica-ში გადავიდა, სადაც Meta Ray-Ban-ის ჭკვიან სათვალეებზე მუშაობდა, რომინი კი სმენის მოვლის კომპანია Audicus-ის საოპერაციო დირექტორი (COO) გახდა. 2024 წლის ბოლოს მათ ძალები გააერთიანეს და Legato დააფუძნეს.

მიზანი: სმენის კორექცია ისეთივე ბუნებრივი გახდეს, როგორც მხედველობის

ტრივედის განმარტებით, კომპანიის მიზანია სმენის მოვლა ისეთივე ხელმისაწვდომი და ჩვეულებრივი გახდეს, როგორც მხედველობის კორექციაა. მისი თქმით, თვალის შემოწმება, სათვალის შერჩევა და მისი ტარება ყოველდღიურობის ბუნებრივი ნაწილია და ადამიანები ამას მთელი ცხოვრება ყოველგვარი დისკომფორტის გარეშე აკეთებენ. Legato-ს სურს, რომ სმენის შემთხვევაშიც იგივე მიდგომა დაინერგოს — ადამიანებმა მოაგვარონ ეს პრობლემა და მასზე ზედმეტი ფიქრი აღარ მოუწიოთ.

Legato ორიენტირებულია იმ ადამიანებზე, რომლებსაც სმენის მსუბუქი ან საშუალო ხარისხის დაქვეითება აქვთ, რაც ამ პრობლემის მქონე მოსახლეობის ყველაზე დიდ სეგმენტს წარმოადგენს. სტარტაპის მიზანია სმენის აპარატებთან დაკავშირებული სტიგმის, მაღალი ფასისა და დისკომფორტის აღმოფხვრა. ამისთვის მათ შექმნეს მაქსიმალურად მსუბუქი და კომპაქტური სათვალეები, რომლებშიც საკუთარი აკუსტიკური სისტემა, სიგნალის დამუშავების ტექნოლოგია და მექანიკური არქიტექტურაა ინტეგრირებული.

ინოვაციური მიდგომა და ტექნოლოგია

ტრადიციული სმენის აპარატები ხშირად მიმართულებით მიკროფონებს იყენებენ, რაც კარგად მუშაობს წყნარ გარემოში, მაგრამ ხმაურიან ადგილებში, მაგალითად რესტორნებში, ეფექტურობას კარგავს. Legato განსხვავებულ გზას მიჰყვება: ხელოვნური ინტელექტის მეშვეობით სისტემა ერთმანეთისგან ასხვავებს ფონურ ხმაურსა და ადამიანის ხმას, რის შედეგადაც მხოლოდ საუბრის ხმას აძლიერებს. ეს ამცირებს იმ კოგნიტურ დატვირთვას, რაც ხშირად თან ახლავს ტრადიციული აპარატების გამოყენებას.

„ჩვენ გვსურდა შეგვექმნა უნიკალური გამოცდილება — მოწყობილობა, რომელიც გამოიყურება როგორც ჩვეულებრივი სათვალე, არის მარტივი გამოსაყენებელი, არ საჭიროებს რთულ კონფიგურაციას და მუშაობს ყველგან მთელი დღის განმავლობაში“, — აცხადებს ტრივედი.

მიუხედავად იმისა, რომ სათვალეს ღია დიზაინი აქვს, ხმა გარშემომყოფებისთვის არ ისმის. მოწყობილობა აღჭურვილია ორმაგი დინამიკების სისტემით, რომელიც ხმას პირდაპირ მომხმარებლისკენ მიმართავს, ხოლო გარედან გამავალ ბგერებს ახშობს. ყურიდან სულ რაღაც რამდენიმე სანტიმეტრის დაშორებით ხმა 99%-ით მცირდება.

ინვესტიციები და ხელმისაწვდომობა

კომპანიამ დაფინანსება Neotribe Ventures-ისგან, Listen-ისგან და Village Global-ისგან მიიღო. ეს თანხა ძირითადად პროდუქტის განვითარებასა და მარკეტინგს მოხმარდა. დამფუძნებლების აზრით, სმენის გაუმჯობესება პირდაპირ კავშირშია ჯანმრთელობის სხვა ფაქტორებთან, რადგან ის ამცირებს დემენციისა და დეპრესიის რისკებს და ეხმარება ადამიანებს სამყაროსთან კავშირის შენარჩუნებაში.

Legato Frames-ის გაყიდვები მიმდინარე წლის ბოლოს დაიწყება. მათი შეძენა შესაძლებელი იქნება შერჩეულ ოპტიკურ ცენტრებში მთელი ქვეყნის მასშტაბით. კომპანიის განცხადებით, სათვალეები ტრადიციულ სმენის აპარატებზე ბევრად იაფი ეღირება და ოპტიკურ კლინიკებში შეძენისას შესაძლოა მხედველობის დაზღვევითაც დაიფაროს.