Meta Facebook-ისა და Instagram-ისთვის ახალ მხარდაჭერის ცენტრს და AI ასისტენტს ნერგავს

კომპანია Meta-მ Facebook-ისა და Instagram-ის მომხმარებლებისთვის ახალი, ცენტრალიზებული მხარდაჭერის ჰაბის გაშვების შესახებ განაცხადა. კომპანიაში აღიარებენ, რომ მათი წინა მხარდაჭერის სერვისები „ყოველთვის არ აკმაყოფილებდა მოლოდინებს“. ახალი ჰაბი მომხმარებლებს ანგარიშთან დაკავშირებული პრობლემების შეტყობინების, დაკარგულ ანგარიშზე წვდომის აღდგენისა და კითხვებზე პასუხების მიღების საშუალებას მისცემს, რაშიც მათ ხელოვნურ ინტელექტზე დაფუძნებული საძიებო სისტემა და AI ასისტენტი დაეხმარება.

ახალი ფუნქცია უკვე ხელმისაწვდომია გლობალურად, Facebook-ისა და Instagram-ის iOS და Android აპლიკაციებში. ამასთან ერთად, კომპანია ტესტავს ახალ AI ასისტენტს, რომელიც შექმნილია უფრო პერსონალიზებული დახმარების გასაწევად ისეთ საკითხებში, როგორიცაა ანგარიშის აღდგენა, პროფილის მართვა ან პარამეტრების განახლება. ეს კონკრეტული ფუნქცია თავდაპირველად Facebook-ის მომხმარებლებისთვის იქნება ხელმისაწვდომი, თუმცა კომპანია მომავალში მის სხვა აპლიკაციებში ინტეგრირებასაც გეგმავს.

Meta-ს მტკიცებით, ხელოვნური ინტელექტის სისტემების გამოყენება მომხმარებელთა ანგარიშების დაცვას მნიშვნელოვნად აუმჯობესებს. კომპანიის მონაცემებით, Facebook-სა და Instagram-ზე ანგარიშების გატეხვის შემთხვევები გლობალურად 30%-ზე მეტით შემცირდა. AI ასევე გამოიყენება სხვა საფრთხეების, მათ შორის ფიშინგის, საეჭვო ავტორიზაციისა და კომპრომეტირებული ანგარიშების იდენტიფიცირებისა და შეჩერებისთვის.

გარდა ამისა, Meta აცხადებს, რომ ხელოვნურმა ინტელექტმა შეამცირა ანგარიშების შეცდომით გაუქმების შემთხვევები და დააჩქარა გასაჩივრების პროცესი. თუმცა, ეს განცხადება ეწინააღმდეგება Meta-ს აპლიკაციების ათასობით მომხმარებლის გამოცდილებას, რომლებიც ჩივიან, რომ კომპანიის სისტემების შეცდომების გამო დაკარგეს წვდომა პირად ანგარიშებსა თუ Facebook გვერდებზე.

ზოგიერთი მომხმარებელი ეჭვობს, რომ პრობლემების მიზეზი სწორედ ხელოვნური ინტელექტია, რადგან შეცდომებისა და მხარდაჭერის მოთხოვნების განხილვის პროცესში ადამიანური ზედამხედველობა არ შეიმჩნევა. მომხმარებელთა ნაწილი კომპანიას სასამართლოში უჩივის ან ამით იმუქრება, განსაკუთრებით მაშინ, როცა ანგარიშის დაკარგვა რეალურ გავლენას ახდენს მათ ბიზნესსა და შემოსავალზე. ვითარება იმდენად გართულდა, რომ წელს Reddit-ზე შეიქმნა ფორუმი იმ ადამიანების დასახმარებლად, რომლებიც Meta-ს გაუქმებული ანგარიშების გამო უჩივიან.

Meta-ში მიაჩნიათ, რომ ახალი ჰაბი ამგვარი პრობლემების მოგვარებას შეძლებს. ის მოახდენს ანგარიშის აღდგენის ვარიანტების ცენტრალიზებას და შესთავაზებს მომხმარებელს გამარტივებულ პროცესს, უფრო მკაფიო ინსტრუქციებითა და ვერიფიკაციით. კომპანია გვპირდება, რომ სისტემა გააუმჯობესებს SMS და ელექტრონული ფოსტით გაგზავნილ შეტყობინებებს საეჭვო აქტივობის შესახებ და უკეთ ამოიცნობს მომხმარებლის მოწყობილობებს.

ახალი ჰაბი მომხმარებლებს ანგარიშის დაცვის სხვა ინსტრუმენტებთანაც დააკავშირებს, როგორიცაა უსაფრთხოების შემოწმება, ორფაქტორიანი ავთენტიფიკაციის დაყენება ან წვდომის გასაღების (passkey) დამატება. ანგარიშის აღდგენის მეთოდებს ასევე დაემატა ვინაობის დასადასტურებლად სელფის ვიდეოს გადაღების არჩევითი ფუნქცია.

მიუხედავად იმისა, რომ Meta-ს მტკიცებით, ახალი ჰაბი მომხმარებლებს ცხოვრებას გაუადვილებს, პარამეტრებისა და დახმარების სექციების გადაადგილებამ შესაძლოა გაუგებრობა გამოიწვიოს. წლების განმავლობაში Meta რეგულარულად ცვლიდა ისეთი მნიშვნელოვანი ფუნქციების ადგილმდებარეობას, როგორიცაა ანგარიშის პარამეტრები, მონაცემთა მართვის ინსტრუმენტები და კონფიდენციალურობის მენიუ. მუდმივი ცვლილებები იწვევს იმას, რომ მომხმარებლებს უჭირთ აპლიკაციაში სასურველი ფუნქციის პოვნა, რადგან ის ხშირად აღარ არის იქ, სადაც ადრე იყო.