სემ ალტმანის ჩვენება: მასკი OpenAI-ის საკუთარი შვილებისთვის გადაცემას განიხილავდა

OpenAI-ის აღმასრულებელმა დირექტორმა, სემ ალტმანმა, სასამართლოში ჩვენება მისცა, რათა თავი დაეცვა ყოფილი თანადამფუძნებლის, ილონ მასკის სარჩელისგან. მასკი OpenAI-ის კორპორაციულ სტრუქტურას აპროტესტებს და ამტკიცებს, რომ დამფუძნებლებმა „საქველმოქმედო ორგანიზაცია მოიპარეს“, როდესაც მოგებაზე ორიენტირებული შვილობილი კომპანია შექმნეს, რათა ბაზარზე კომპანიის AI მოდელებზე დაფუძნებული პროდუქტები გაეტანათ.

კითხვაზე, თუ რას ფიქრობს მასკის ამ ბრალდებაზე, ალტმანმა რამდენიმეწამიანი დუმილის შემდეგ უპასუხა: „მიჭირს ამგვარი ფორმულირების გააზრებაც კი. ჩვენ შევქმენით მსოფლიოში ერთ-ერთი უდიდესი საქველმოქმედო ორგანიზაცია. ეს ფონდი წარმოუდგენელ სამუშაოს ასრულებს და მომავალში კიდევ უფრო მეტს გააკეთებს“.

მასკის ადვოკატები ხაზს უსვამდნენ იმ ფაქტს, რომ OpenAI-ის ფონდს, რომლის აქტივებიც ამჟამად 200 მილიარდ დოლარს აღწევს, მიმდინარე წლის დასაწყისამდე სრულ განაკვეთზე მომუშავე თანამშრომლები არ ჰყავდა. OpenAI-ის საბჭოს თავმჯდომარემ, ბრეტ ტეილორმა განმარტა, რომ ეს გამოწვეული იყო კაპიტალის ნაღდ ფულად კონვერტაციის სირთულით, რაც მხოლოდ 2025 წლის ბოლო რესტრუქტურიზაციის შედეგად გახდა შესაძლებელი.

უსაფრთხოება და კონტროლის საკითხი

სასამართლო პროცესის ცენტრალური კითხვაა, ხომ არ დარჩა კომპანიის ერთგულება უსაფრთხოებისადმი უკანა პლანზე მისი კომერციული ძალაუფლების ზრდასთან ერთად. თუმცა, ალტმანის თქმით, ჯერ კიდევ 2017 წელს, როდესაც დამფუძნებლები AI მოდელების დასაფინანსებლად გზებს ეძებდნენ, მასკის „უსაფრთხოების კონკრეტულმა გეგმებმა“ მასში შეშფოთება გამოიწვია.

ალტმანმა გაიხსენა „განსაკუთრებით შემაშფოთებელი მომენტი“, როდესაც დებატებისას მასკს ჰკითხეს, რა მოხდებოდა, თუ ის მოულოდნელად გარდაიცვლებოდა იმ დროს, როცა OpenAI-ის მოგებაზე ორიენტირებულ სტრუქტურას აკონტროლებდა. ალტმანის თქმით, მასკმა უპასუხა: „შესაძლოა, OpenAI ჩემს შვილებს გადაეცეთ“.

ალტმანმა აღნიშნა, რომ მასკის სურვილმა, ერთპიროვნულად გაეკონტროლებინა კომპანია, ის დააეჭვა. OpenAI-ის მიზანი იყო, მოწინავე ხელოვნური ინტელექტი ერთი ადამიანის ხელში არ აღმოჩენილიყო. ალტმანმა, თავისი გამოცდილებით სტარტაპ აქსელერატორ Y Combinator-ში, იცოდა, რომ „დამფუძნებლები, რომლებიც კონტროლს მოიპოვებენ, მას ჩვეულებრივ აღარ თმობენ“.

მართვის სტილი და შიდა კულტურა

ალტმანმა ასევე ისაუბრა მასკის მართვის ტაქტიკაზე, რომელიც, მისი აზრით, საინჟინრო და წარმოების სფეროებში შესაძლოა მუშაობდა, მაგრამ OpenAI-სთვის შეუსაბამო აღმოჩნდა. „არ ვფიქრობ, რომ ბატონმა მასკმა იცოდა, როგორ ემართა კარგი კვლევითი ლაბორატორია“, — განაცხადა ალტმანმა.

მისი თქმით, მასკმა რამდენიმე საკვანძო მკვლევარს მოტივაცია დაუკარგა. ერთ მომენტში მან გრეგ ბროკმანსა და ილია სუცკევერს მოსთხოვა, შეედგინათ მკვლევართა სია მათი მიღწევების მიხედვით, მოეხდინათ მათი რანჟირება და ბევრი მათგანი „ბენზოხერხით“ (chainsaw) გაეშვათ. ალტმანის განცხადებით, ამან ორგანიზაციის კულტურას დიდი ხნით მიაყენა ზიანი.

ალტმანმა საკუთარი თავი წარმოაჩინა, როგორც თანადამფუძნებლების, გრეგ ბროკმანისა და ილია სუცკევერის ინტერესების დამცველი, რომლებიც იმ დროს რეალურად მართავდნენ OpenAI-ს, სანამ მასკსა და ალტმანს სხვა საქმეები ჰქონდათ. ამ კონფლიქტის შემდეგ მასკმა საბოლოოდ დატოვა OpenAI-ის საბჭო და კონკურენტი AI ინიციატივები წამოიწყო Tesla-სა და საკუთარ სტარტაპ xAI-ში.

ურთიერთობა კონფლიქტის შემდეგ

მიუხედავად დაპირისპირებისა, ალტმანი ინარჩუნებდა კავშირს ბიზნესმენთან, აწვდიდა ინფორმაციას OpenAI-ის მუშაობის შესახებ და რჩევებსა თუ დაფინანსებას სთხოვდა. OpenAI-ის იურისტებმა აღნიშნეს, რომ მასკი მუდმივად საქმის კურსში იყო და მას სთავაზობდნენ მონაწილეობას იმ ინვესტიციებში, რომლებსაც ახლა თავის სარჩელში არაკომერციული ორგანიზაციის „გამხრწნელად“ მოიხსენიებს.

2018 წელს Microsoft-ის ინვესტიციის განხილვისას, ალტმანმა აღნიშნა, რომ მასკთან ბევრი სხვა შეხვედრისგან განსხვავებით, ეს იყო „პოზიტიური შეხვედრა“, სადაც მასკი დიდხანს აჩვენებდა მათ თავის ტელეფონში არსებულ მემებს (memes).