Startup Battlefield-ის კონკურსში მონაწილეობის მისაღებად სტარტაპები საგანგებოდ შეირჩნენ. თითოეულმა მათგანმა საკუთარი პროექტი ვენჩურული კაპიტალისტებისა და ტექნოლოგიური სფეროს ლიდერებისგან შემდგარი ჟიურის წინაშე წარადგინა, სადაც პროდუქტების ცოცხალი დემონსტრაციები გაიმართა.
ხანგრძლივი მსჯელობის შემდეგ, TechCrunch-ის რედაქტორებმა ჟიურის შენიშვნები დეტალურად განიხილეს და ხუთი ფინალისტი გამოავლინეს: Apate, Flox Intelligence, Intero Biosystems, Industrial Next და Satlyt. ფინალურ ეტაპზე ხუთეულმა პრეზენტაციები ჟიურის დასკვნითი შემადგენლობის წინაშე წარადგინა, რომელშიც შედიოდნენ: ალექსა ფონ ტობელი (Inspired Capital), ჩი-ჰუა ჩიენი (Goodwater Capital), დაინა გრეისონი (Construct Capital), კარლ ალომარი (M13) და სტეისი ბრაუნ-ფილპოტი (Cherryrock Capital).
ოფიციალურად ცნობილი გახდა, რომ TechCrunch Startup Battlefield 2026-ის გამარჯვებული Intero Biosystems-ია.
გამარჯვებული: Intero Biosystems
Intero Biosystems დენვერში დაფუძნებული სტარტაპია, რომელიც ჩარლი ჩაილდსმა და მადელინ ეიკენმა მიჩიგანის უნივერსიტეტის ბაზაზე შექმნეს. კომპანია 1 მილიმეტრიანი ადამიანის ნაწლავის „ორგანოიდებს“ ავითარებს. ეს არის ლაბორატორიულ პირობებში გამოყვანილი ქსოვილი, რომელიც ადამიანის ნაწლავის ფუნქციონირებას იმეორებს. აღნიშნული ტექნოლოგია იძლევა შესაძლებლობას, ადამიანებზე გამოცდამდე შესწავლილ იქნას, თუ როგორ მოქმედებს მედიკამენტები და სხვა ნაერთები ორგანიზმზე.
სტარტაპი თავის ფლაგმანურ პროდუქტს, GastroScreen-ს, ფარმაცევტულ, ბიოტექნოლოგიურ, კვებისა და ქიმიურ კომპანიებს სთავაზობს მედიკამენტებისა და სხვადასხვა ნივთიერებების ტესტირებისთვის.
მეორე ადგილი: Apate
Apate ავსტრალიური სტარტაპია, რომელიც დალი კააფარმა სიდნეის მაკუორის უნივერსიტეტში კვლევის ჩატარებისას დააფუძნა. კომპანია ათასობით ხელოვნური ინტელექტის აგენტს იყენებს, რომლებიც თავს უდანაშაულო მსხვერპლად ასაღებენ: ისინი პასუხობენ თაღლითურ ზარებს, შეტყობინებებსა და ელექტრონულ წერილებს, გადადიან ფიშინგ-ბმულებზე და ერთიანდებიან სოციალური მედიის ჯგუფებში თაღლითების გამოსააშკარავებლად.
აგენტების ფლოტთან წვდომის გარდა, მომხმარებლები იღებენ ანალიტიკურ პორტალს, რომელიც ინფორმაციას აწვდის მათ მომხმარებლებზე, თანამშრომლებზე, ბრენდებსა თუ პროდუქტებზე მიმართული თაღლითური სქემების შესახებ.
ეს ორი კომპანია შეუერთდა Startup Battlefield-ის ისეთ ცნობილ გამარჯვებულებსა და ფინალისტებს, როგორებიცაა Trello, Discord, Cloudflare და Mint. პროგრამის არსებობის მანძილზე მასში 1700-ზე მეტმა სტარტაპმა მიიღო მონაწილეობა. Battlefield-ის კურსდამთავრებულებმა ჯამში 30 მილიარდ დოლარზე მეტი დაფინანსება მოიპოვეს და 200-ზე მეტი წარმატებული „ეგზიტი“ (exit) განახორციელეს.
