ტეხასში თვითმართვადმა ავტომობილმა იხვი გაიტანა, რამაც ადგილობრივი მოსახლეობის უკმაყოფილება გამოიწვია

ტეხასის შტატის ქალაქ ოსტინში, მიულერ ლეიკის რაიონში მომხდარმა ინციდენტმა ადგილობრივ მოსახლეობაში თვითმართვადი ავტომობილების უსაფრთხოებასთან დაკავშირებით კითხვები გააჩინა. მიუხედავად იმისა, რომ ცხოველების ავტოსაგზაო შემთხვევებში დაღუპვა ხშირია, ამ კონკრეტულმა შემთხვევამ ახალი ტექნოლოგიების მიმართ ნეგატიური ყურადღება მიიპყრო.ინციდენტი მას შემდეგ გახდა საჯარო, რაც ერთ-ერთმა მაცხოვრებელმა სოციალურ ქსელში დაწერა, რომ კომპანია Avride-ის თვითმართვადმა ავტომობილმა, რომლის საჭესთანაც უსაფრთხოების ოპერატორი იჯდა, იხვი გაიტანა და გაჩერების გარეშე განაგრძო გზა. თვითმხილველის თქმით, ავტომობილს სიჩქარე არ შეუმცირებია და არც მანევრირება უცდია.ადგილობრივების განსაკუთრებული უკმაყოფილება იმ ფაქტმა გამოიწვია, რომ ეს იხვი მათთვის კარგად ნაცნობი იყო — ის ბუდობდა ერთ-ერთი იტალიური რესტორნის წინ მდებარე ქოთანში. რაც შეეხება იხვის კვერცხებს, Axios-ის ინფორმაციით, მოსახლეობამ ისინი ინკუბატორში მოათავსა.კომპანია Avride-ის წარმომადგენელმა TechCrunch-თან დაადასტურა, რომ შემთხვევის დროს ავტომობილი ავტონომიურ რეჟიმში იმყოფებოდა. მიუხედავად იმისა, რომ კომპანიას საჯარო გზებზე ტესტირება არ შეუწყვეტია, მათ შეცვალეს მარშრუტები და ამოიღეს ის ქუჩები, რომლებიც ტბის მიმდებარე ტერიტორიაზე მდებარეობს.მოსახლეობის ბრალდებას იმის შესახებ, რომ ავტომობილმა „Stop“ ნიშანთან არ გააჩერა, კომპანია არ ეთანხმება. Avride-ის განცხადებით, მონაცემების შემოწმების შემდეგ დადასტურდა, რომ ავტომობილმა ყველა შესაბამის ნიშანთან სრული გაჩერება განახორციელა. კომპანიის წარმომადგენლის, იულია შვეიკოს თქმით, გუნდმა დეტალურად შეისწავლა ავტომობილის ქცევა და სცენა სიმულაციაში რამდენჯერმე გაითამაშა.ამჟამად Avride მუშაობს ტექნოლოგიის გაუმჯობესებაზე მსგავსი შემთხვევების თავიდან ასაცილებლად. ეს პროცესი მოიცავს კონტროლირებად ექსპერიმენტებს სიმულაციურ გარემოში, რათა დარწმუნდნენ, რომ ცვლილებები უარყოფითად არ იმოქმედებს ავტომობილის უსაფრთხოებაზე სხვა სცენარებში.აღსანიშნავია, რომ ოსტინში თვითმართვად ავტომობილებს მხოლოდ Avride არ ტესტავს. ქალაქში ასევე მუშაობენ Zoox, Tesla და Waymo (Uber-თან პარტნიორობით), რომლებიც რობოტაქსების სერვისს სთავაზობენ მომხმარებლებს.