Hermeus-მა უპილოტო ჰიპერბგერითი გამანადგურებლების შესაქმნელად 350 მილიონი დოლარი მოიზიდა

თავდაცვის სფეროს სტარტაპმა Hermeus-მა 350 მილიონი დოლარის ინვესტიცია მოიზიდა, რათა გააგრძელოს მუშაობა პროექტზე, რომელსაც თავად „ყველაზე სწრაფ უპილოტო საფრენ აპარატს“ უწოდებს. დაფინანსების ამ რაუნდის შედეგად კომპანიის საბაზრო ღირებულებამ 1 მილიარდ დოლარს მიაღწია.

ლოს-ანჯელესში ბაზირებულმა სტარტაპმა სამშაბათს განაცხადა, რომ 200 მილიონი დოლარი კაპიტალის დაფინანსების სახით მიიღო, რომელსაც Khosla Ventures ხელმძღვანელობდა. პროცესში ასევე მონაწილეობდნენ არსებული ინვესტორები: Canaan Partners, Founders Fund, In-Q-Tel და RTX Ventures. ახალი კაპიტალი შემოვიდა მედიაკონგლომერატ Cox Enterprises-ის ვენჩურული ფონდიდან, საჯარო საინვესტიციო კომპანია Destiny Tech100-დან და სხვა წყაროებიდან.

დარჩენილი 150 მილიონი დოლარი კომპანიამ ვალის სახით აიღო. Hermeus-ის თანადამფუძნებელმა და აღმასრულებელმა დირექტორმა, ეიჯეი პიპლიკამ (AJ Piplica) TechCrunch-თან საუბრისას აღნიშნა, რომ ეს სტრატეგია სტარტაპს და მის მზარდ კაპიტალის სტრუქტურას კონტროლის შენარჩუნებაში დაეხმარება. მისი თქმით, ვინაიდან კომპანია დიდ რესურსს ხარჯავს ტექნიკურ აღჭურვილობასა და საწარმოო სიმძლავრეების გაფართოებაზე, ხარჯების დიდი ნაწილის არა-დილუციური (წილის არგამომყოფი) დაფინანსება ოპტიმალური გადაწყვეტილებაა.

Hermeus-ის მიერ კაპიტალის მოზიდვა ემთხვევა პერიოდს, როდესაც ვენჩურული და კორპორატიული ინვესტორები თავდაცვის ტექნოლოგიების სტარტაპებში დიდ თანხებს აბანდებენ. PitchBook-ის მონაცემებით, გასულ წელს თავდაცვის ტექნოლოგიებში განხორციელებულმა ვენჩურულმა ინვესტიციებმა გლობალურად 9 მილიარდ დოლარს გადააჭარბა 265 რაუნდის ფარგლებში, საიდანაც კორპორატიულმა ინვესტორებმა 2 მილიარდი დოლარი 28 რაუნდში დააბანდეს.

სტრატეგიული ცვლილება და ტექნიკური დაჩქარება

პიპლიკა წარმატებულ დაფინანსებას ნაწილობრივ იმ ტექნიკურ ცვლილებას უკავშირებს, რომელიც Hermeus-მა რამდენიმე წლის წინ განახორციელა. თავდაპირველად სტარტაპი საკუთარი ძრავის შექმნაზე ხარჯავდა დროსა და ფინანსებს, რაც ნაწილობრივ აუცილებლობით იყო გამოწვეული. თუმცა, მას შემდეგ, რაც კომპანიამ RTX Ventures-თან (RTX Corporation-ის ვენჩურული ფილიალი, რომელიც ადრე Raytheon-ის სახელით იყო ცნობილი) თანამშრომლობა დაიწყო, ახალი შესაძლებლობა გამოჩნდა.

პიპლიკამ და მისმა გუნდმა გადაწყვიტეს, RTX-ის შვილობილ კომპანია Pratt & Whitney-სთან ერთად ემუშავათ F100 ძრავის მოდიფიცირებაზე, რათა ის Hermeus-ის ჰიპერბგერითი აპარატისთვის გამოეყენებინათ. ამ ნაბიჯმა კომპანიას საშუალება მისცა, უკვე გამოცდილი და ფუნქციური ძრავით უფრო სწრაფად წასულიყო წინ, გაეადვილებინა ტესტირების პროცესი და პარალელურად აშშ-ის მთავრობასთან ახალი კონტრაქტები გაეფორმებინა.

კომპანიის პრეზიდენტის, ზაკ შორის (Zach Shore) თქმით, ნაცვლად იმისა, რომ მხოლოდ ერთი დიდი მიზნისკენ — Mach 5 სიჩქარის (ბგერის სიჩქარეზე ხუთჯერ სწრაფი) აპარატის შექმნისკენ — ესწრაფათ, Hermeus-მა შეძლო საქმიანობის დივერსიფიკაცია.

„ეს გვაჩქარებს Mach 5-ისკენ მიმავალ გზაზე და ამავდროულად აძლიერებს ბიზნესის ეკონომიკურ მხარეს, რადგან ვაკმაყოფილებთ თავდაცვის დეპარტამენტის მიმდინარე მოთხოვნებს. ვფიქრობ, ამგვარად ჩვენ გვაქვს რამდენიმე გადამკვეთი სფერო, რომლებიც ერთდროულად აძლიერებენ ბიზნესს, კლიენტებთან ურთიერთობასა და ტექნოლოგიურ სიმწიფეს“, — აღნიშნა შორმა.

პროტოტიპირების პროცესი და გამოწვევები

გასულ თვეში Hermeus-მა გამოსცადა თავისი ტექნოლოგიის სადემონსტრაციო ვერსია, რომელიც ზომით F-16 გამანადგურებლის ტოლი იყო. სტარტაპის გეგმით, შემდეგი მოდელი უკვე ზებგერით სიჩქარეს განავითარებს, მესამე აპარატი კი ამჟამად დამუშავების პროცესშია.

პიპლიკას განმარტებით, პროტოტიპირების ასეთი სწრაფი მიდგომა ავიაციაში იშვიათობაა. ის მაგალითად SpaceX-ს ასახელებს, რომელიც ინდუსტრიის სტანდარტად იქცა თავისი მზაობით — ააშენოს, გამოსცადოს, განიცადოს წარუმატებლობა, ისწავლოს შეცდომებზე და გაიმეოროს პროცესი მანამ, სანამ სრულყოფილ აპარატს არ მიიღებს.

სწორედ ამიტომ, Hermeus-ისთვის ყველაზე დიდ გამოწვევას ტალანტების მოძიება და განვითარება წარმოადგენს. პიპლიკა აღნიშნავს:

„მსოფლიოში არსად არ არის კომპანია, რომელიც ყოველწლიურად აშენებს ახალ, სრულმასშტაბიან საფრენ აპარატებს ნულიდან. ადრე ადამიანები ამას აკეთებდნენ, მაგრამ ისინი უკვე აღარ არიან, რაც იმას ნიშნავს, რომ ჩვენ თავად უნდა აღვზარდოთ ასეთი კადრები.“

მომავლის გეგმები

ახალი დაფინანსება Hermeus-ს დაეხმარება პერსონალის გაზრდაში, რომელთა რაოდენობა ამჟამად 300 თანამშრომელს უახლოვდება. კომპანიამ უკვე ჩაატარა ორი წარმატებული სატესტო ფრენა (გასულ წელს მათ გამოსცადეს სადემონსტრაციო მოდელი, რომელიც სამჯერ უფრო პატარა იყო).

მიუხედავად წარმატებისა, პიპლიკა ხაზს უსვამს, რომ კომპანია მზად უნდა იყოს გარკვეული წარუმატებლობისთვის, რაც პროტოტიპირების სწრაფი პროცესის განუყოფელი ნაწილია. მისი თქმით, მთავარი გამოწვევაა რისკების სწორად შერჩევა და კაპიტალის გონივრული გადანაწილება. „შესაძლოა, რომელიმე თვითმფრინავი ჩამოვარდეს და ველოდები კიდეც, რომ ეს განვითარების რომელიმე ეტაპზე მოხდება. ჩვენ ისე ვართ მოწყობილი, რომ ეს მაქსიმალურად უსაფრთხოდ ჩაივლის. სწორედ ამიტომ არის ბევრი აპარატის აშენება კრიტიკულად მნიშვნელოვანი. თუ ბევრს არ ააშენებ, პროცესი გაცილებით დიდხანს გაიწელება“, — დასძინა მან.

შენიშვნა: სტატიის თავდაპირველ ვერსიაში გამოყენებული იყო ტერმინი „ავტონომიური“, თუმცა Hermeus-ის საფრენი აპარატები არის უპილოტო, რაც იმას ნიშნავს, რომ ისინი დისტანციურად იმართება.