Tesla მეორე თაობის Roadster-ს 1 ოქტომბერს წარადგენს

Tesla-ს მეორე თაობის Roadster, რომელსაც ავტომოყვარულები დიდი ხანია ელიან, შესაძლოა მალე საზოგადოების წინაშე წარდგეს. შაბათს, სოციალურ ქსელ X-ზე გამოქვეყნებულ პოსტში, ელექტრომობილების მწარმოებელმა კომპანიამ მოკლე ფრაზა — „Go for launch“ (მზადება გაშვებისთვის) და გრაფიკული გამოსახულება წარწერით „10.01“ გამოაქვეყნა. შესაბამისად, მოსალოდნელია, რომ ახალი Roadster-ის დებიუტი 1 ოქტომბერს შედგება.გამოქვეყნებული გრაფიკა ასევე მიანიშნებს „ცივი აირის რეაქტიულ ძრავებზე“ (cold gas thrusters), რომლებიც ილონ მასკის მეორე კომპანიის, SpaceX-ის მიერ არის შემუშავებული. აღნიშნული ოპციური ფუნქცია Roadster-ს გარკვეულწილად „ფრენის“ შესაძლებლობას მისცემს. Tesla-ს მეორე თაობის სპორტული ავტომობილი პირველად 2017 წლის ნოემბერში დაანონსდა, თუმცა მისი გამოშვების თარიღმა არაერთხელ გადაიწია.ავტომობილის დაგვიანება გასულ წელს სოციალურ ქსელში ილონ მასკსა და OpenAI-ის აღმასრულებელ დირექტორს, სემ ალტმანს შორის დაპირისპირების მიზეზიც გახდა. ალტმანმა აღნიშნა, რომ 50 000-დოლარიანი წინასწარი ჯავშნის შემდეგ „7.5 წელი ლოდინისთვის ძალიან დიდი დროა“, რაზეც მასკმა უპასუხა, რომ ალტმანმა თანხა უკვე დაიბრუნა.გამოცემა The Information-ის ბოლო ცნობებით, 2017 წლის ვერსიაზე მუშაობა სრულად შეწყდა და კომპანიამ სრულიად ახალი დიზაინი შექმნა, რომლის პრეზენტაციაც უახლოეს მომავალში იგეგმება. ილონ მასკმა მანამდე აღიარა, რომ გრანდიოზული პრეზენტაციის შემდეგაც კი, Roadster-ის წარმოება კიდევ 12 ან 18 თვის განმავლობაში არ დაიწყება.