Tressfecta: ინოვაციური ტექნოლოგია, რომელიც თმის დაწვნის ხანგრძლივ და მტკივნეულ პროცესს ამარტივებს

24 წლის აისატა დიალო (Aisata Diallo) თავს გამოცდილ სტილისტს უწოდებს, რომლისთვისაც თმის დაწვნა ცხოვრების განუყოფელი ნაწილია. მან საკუთარი თმის დაწვნა ბავშვობიდან დაიწყო, ხოლო ბოსტონში, ჩრდილო-აღმოსავლეთის უნივერსიტეტში (Northeastern University) სწავლის პერიოდში, ეს საქმიანობა მცირე ბიზნესად აქცია. დიალომ შენიშნა, რომ ბაზარზე ტექსტურირებული თმის სპეციალისტების ნაკლებობა იყო და გადაწყვიტა ეს თავისუფალი ნიშა თავად შეევსო.

მუშაობის პროცესში ის პირისპირ შეეჯახა იმ სირთულეებს, რაც თმის დაწვნის სტილისტიკას ახლავს. ეს არის სრულად მექანიკური პროცესი, სადაც ერთი კონკრეტული ვარცხნილობის დასრულებას ხშირად რვა საათი სჭირდება. ბევრი პროფესიონალი სტილისტი, რომელიც მთელ დღეს ფეხზე დგომაში ატარებს, ისეთ პრობლემებს აწყდება, როგორიცაა კუნთების სპაზმი და მაჯის არხის სინდრომი (carpal tunnel syndrome).

ფიზიკური გადაღლისა და სხეულზე უარყოფითი ზეგავლენის გამო, დიალომ დროებით შეწყვიტა თმის დაწვნა. სწორედ ამ პერიოდში გაუჩნდა კითხვა, შეძლებდა თუ არა ხელოვნური ინტელექტი ამ პროცესის გარკვეული ნაწილის ავტომატიზებას. ტექსტურირებული თმის მოვლის ბაზარი დიდი ხნის განმავლობაში ყურადღების მიღმა რჩებოდა, ხოლო ამ სფეროსთვის ტექნიკური მოწყობილობების შექმნა დიდ ხარჯებთან და სირთულეებთანაა დაკავშირებული, რაც ინოვაციების სიმცირეს განაპირობებს.

Tressfecta და Plait Pilot: ინოვაცია თმის მოვლაში

გასულ წელს აისატა დიალომ დააფუძნა კომპანია Tressfecta, რომელიც სპეციალურად ტექსტურირებული თმისთვის განკუთვნილ პროდუქტებს ქმნის. სტარტაპის პირველი პროექტია მოწყობილობა Plait Pilot, რომელიც სტილისტებს თმის დაწვნის მოსამზადებელ ეტაპზე ეხმარება. კერძოდ, ის ავტომატიზებულად ყოფს თმის შეკვრებს ცალკეულ ნაწილებად, რაც ხელით შესრულების შემთხვევაში, განსაკუთრებით წვრილი ნაწნავების დროს, საათობით გრძელდება.

როგორ მუშაობს Plait Pilot:

• სტილისტი ათავსებს დასაწნავ თმას მოწყობილობის ზედა ნაწილზე.
• მოწყობილობაში მიეთითება სასურველი ზომა, თუ რა სისქის ნაწილებად უნდა დაიყოს თმა.
• აპარატი თავად ანაწილებს თმას და აწვდის მას სტილისტს, რათა მან მუშაობის პროცესში მარტივად შეძლოს მომზადებული ნაწილების აღება.

დიალოს განმარტებით, მსგავსი ხელსაწყოს შექმნა საკმაოდ რთულია თმის დაწვნის პროცესის სპეციფიკიდან გამომდინარე. აუცილებელია სხვადასხვა ტიპის ტექსტურირებული თმის გათვალისწინება, სადაც მნიშვნელოვან როლს თამაშობს თმის სიგრძე და სიმკვრივე. შესაბამისად, მოწყობილობა მორგებული უნდა იყოს ინდივიდუალურ საჭიროებებზე და არა ერთ სტანდარტულ მოდელზე.

სტარტაპის განვითარება და სამომავლო გეგმები

Tressfecta ამჟამად გაშვებისწინა ეტაპზეა და Plait Pilot-ის პროტოტიპზე მუშაობს. დამფუძნებელი კომპანიას საკუთარი რესურსებით (bootstrapping) ავითარებს, თუმცა პარალელურად იყენებს გრანტებსა და აქსელერაციის პროგრამებიდან მიღებულ დაფინანსებას. დიალო უკვე ემზადება ინვესტიციების მოსაზიდად, თუმცა აღნიშნავს, რომ ტექნიკური მოწყობილობების, განსაკუთრებით კი სილამაზის ინდუსტრიის ტექნოლოგიების დაფინანსება დიდ სირთულეებთანაა დაკავშირებული.

ამ ეტაპზე დამფუძნებელი აქტიურად ამყარებს კავშირებს სტილისტებთან, რომლებიც ტექნოლოგიის ტესტირებაში მიიღებენ მონაწილეობას. აისატა დიალო ასევე წარდგენილი იყო სან-ფრანცისკოში გამართულ TechCrunch Disrupt-ზე, როგორც Startup Battlefield 200-ის ერთ-ერთი მონაწილე. მისი თქმით, ეს იყო შესანიშნავი შესაძლებლობა პროდუქტის წარსადგენად და ახალი კონტაქტების დასამყარებლად.