Uber-ი ბერლინში დაფუძნებულ სტარტაპ Blacklane-ს ყიდულობს, რომელიც მომხმარებლებს პრემიუმ კლასის ავტომობილებითა და პირადი მძღოლის (chauffeur) მომსახურებით უზრუნველყოფს. ეს ნაბიჯი მიუთითებს იმაზე, რომ ტრანსპორტირების გიგანტი ლუქს კლასისა და ბიზნეს მოგზაურობის სექტორში საქმიანობის გაფართოებას გეგმავს.
Blacklane-ისთვის, რომელიც 2011 წელს დაარსდა, ეს მნიშვნელოვანი ეტაპია. კომპანიამ დაარსების დღიდან 100 მილიონ დოლარზე მეტი ინვესტიცია მოიზიდა ისეთი მსხვილი პარტნიორებისგან, როგორიცაა ავტომობილების გაქირავების სერვისი Sixt, ავტომწარმოებელი Mercedes-Benz და არაბთა გაერთიანებული საამიროების კონგლომერატი ALFAHIM.
Uber-ის განცხადებით, შესყიდვის პროცესი რეგულატორების მხრიდან შესაბამის დასტურს საჭიროებს, თუმცა კომპანია ვარაუდობს, რომ გარიგება მიმდინარე წლის ბოლომდე დაიხურება. მხარეებს შეთანხმების ფინანსური დეტალები არ გაუმჟღავნებიათ.
Uber Elite და სტრატეგიული გაფართოება
აღნიშნული შესყიდვა Uber-ის მიერ Uber Elite-ის გაშვებიდან რამდენიმე კვირაში დაანონსდა. Uber Elite მომხმარებლებს სთავაზობს პრემიუმ კლასის მძღოლის მომსახურებას, რომელიც მოიცავს დამატებით კომფორტს ავტომობილში, აეროპორტში დახვედრასა (meet-and-greets) და 24/7 სატელეფონო მხარდაჭერას.
ამ ეტაპზე Uber Elite მცირე მასშტაბით არის წარმოდგენილი და მხოლოდ ლოს-ანჯელესსა და სან-ფრანცისკოში მოქმედებს, თუმცა უახლოეს მომავალში სერვისის დამატება ნიუ-იორკშიც იგეგმება. თავის მხრივ, Blacklane-ს საკმაოდ ფართო გეოგრაფიული დაფარვა აქვს და ევროპის, ახლო აღმოსავლეთის, აზიის, სამხრეთ და ჩრდილოეთ ამერიკის უმსხვილეს ქალაქებში ოპერირებს.
