Uber მოზარდების უსაფრთხოებისთვის მგზავრობის პირდაპირ ვიდეოტრანსლაციას ნერგავს

კომპანია Uber-მა სამშაბათს ახალი ფუნქციის შესახებ გამოაცხადა, რომელიც მშობლებს საშუალებას მისცემს, თვალი ადევნონ შვილების მგზავრობას პირდაპირ ეთერში. აღნიშნული სიახლე მოზარდების უსაფრთხოების გაძლიერებას ისახავს მიზნად და უახლოეს კვირებში აშშ-ის მასშტაბით სრულად ამოქმედდება.ვიდეოტრანსლაციის ახალი ფუნქცია მძღოლის სელფის კამერას იყენებს. მგზავრობის დაწყებისთანავე, მშობლის ან მეურვის ანგარიშზე იგზავნება შეტყობინება ვიდეო ნაკადის ხელმისაწვდომობის შესახებ. იმ შემთხვევაში, თუ ისინი ტრანსლაციის ყურებას გადაწყვეტენ, ამის შესახებ ინფორმაციას მძღოლიც და მოზარდიც მიიღებენ.

Uber-ის განმარტებით, პირდაპირი ეთერის ნახვა მხოლოდ იმ მშობლებისა თუ მეურვეების ანგარიშებიდან არის შესაძლებელი, რომლებიც მოზარდის პროფილთან არიან დაკავშირებულნი. აღსანიშნავია, რომ სხვა პირებს, რომლებიც შესაძლოა მოზარდთან ერთად მგზავრობდნენ, ვიდეოზე გამოჩენის აკრძალვის (opt-out) შესაძლებლობა არ აქვთ. მგზავრობის დასრულების შემდეგ ვიდეოზე წვდომა იზღუდება — ჩანაწერის ნახვას ვერც მძღოლი, ვერც მოზარდი და ვერც მშობელი ვეღარ შეძლებს.მიუხედავად იმისა, რომ კომპანია ვიდეოს „დაშიფრულს“ (encrypted) უწოდებს, ჯერჯერობით ბუნდოვანია, არის თუ არა ის ბოლოდან ბოლომდე დაშიფრული (end-to-end encrypted). ეს უკანასკნელი ნიშნავს, რომ თავად Uber-საც არ უნდა ჰქონდეს ჩანაწერზე წვდომა. TechCrunch-ის კითხვაზე კომპანიის წარმომადგენელმა კონკრეტული პასუხი არ გასცა.ამ ეტაპზე ფუნქცია უკვე მუშაობს ცხრა დიდ ქალაქში, მათ შორის ატლანტაში (ჯორჯიის შტატი), კლივლენდსა და როდ-აილენდში. უახლოეს კვირებში სერვისი მთელი ამერიკის შეერთებული შტატების მასშტაბით გავრცელდება. Uber-მა მოზარდების ანგარიშები აშშ-ში 2023 წელს წარადგინა, მას შემდეგ კი ეს ფუნქცია 50-ზე მეტ ქვეყანაში გაფართოვდა.