Android 16: ხელოვნური ინტელექტი შეტყობინებებში, პერსონალიზაციის ახალი ეპოქა და გაძლიერებული ფუნქციები

Google-მა სამშაბათს Android 16-ის მასშტაბური განახლებების პაკეტი წარადგინა, რომელიც სრულიად ცვლის ოპერაციული სისტემის განვითარების სტრატეგიას. კომპანია ყოველწლიური დიდი განახლებიდან უფრო ხშირ, მცირე გამოშვებებზე გადადის, რითაც მომხმარებლებს სიახლეებს უფრო ოპერატიულად მიაწვდის. პირველ ეტაპზე, ახალი ფუნქციები Pixel სმარტფონების მფლობელებისთვის გახდება ხელმისაწვდომი.

Android 16-ის ერთ-ერთი მთავარი სიახლე ხელოვნურ ინტელექტზე დაფუძნებული შეტყობინებების შეჯამებაა. ეს ფუნქცია გრძელ ტექსტურ შეტყობინებებსა და ჯგუფურ ჩათებს ავტომატურად დაამოკლებს და მოკლე, მარტივად აღსაქმელ მიმოხილვას შემოგთავაზებთ. ამასთან ერთად, „შეტყობინებების ორგანიზატორი“ ნაკლებად პრიორიტეტულ შეტყობინებებს, როგორიცაა რეკლამები, სიახლეები და სოციალური ქსელების შეტყობინებები, ავტომატურად დააჯგუფებს და დაადუმებს.

განახლება მომხმარებლებს პერსონალიზაციის გაფართოებულ შესაძლებლობებსაც სთავაზობს. უკვე შესაძლებელია აპლიკაციების იკონების ფორმის შეცვლა, თემატური იკონების გამოყენება და ღია ფერის აპლიკაციების ავტომატურად გამუქება, იმ შემთხვევაშიც კი, თუ მათ თავდაპირველად არ აქვთ „ბნელი რეჟიმის“ მხარდაჭერა. სისტემის პარამეტრებში ასევე დაემატა „მშობლის კონტროლის“ ახალი განყოფილება, რომელიც საშუალებას აძლევს მშობლებს, დაუწესონ შვილებს ეკრანთან გატარებული დროის ლიმიტები, შექმნან დასვენების გრაფიკი და გააკონტროლონ აპლიკაციების გამოყენება.

Android 16-ის გარდა, Google-მა ზოგადი Android ფუნქციებიც განაახლა. ბეტა რეჟიმში ინერგება „ზარის მიზეზის“ ფუნქცია, რომელიც მომხმარებელს საშუალებას მისცემს, კონტაქტების სიაში შენახულ ნომერთან დარეკვისას ზარი „გადაუდებლად“ მონიშნოს. ადრესატი შემოსული ზარის ეკრანზე დაინახავს ამ სტატუსს და ეცოდინება, რომ ზარი დროში მგრძნობიარეა. გამოტოვებული ზარის შემთხვევაშიც, „გადაუდებელი“ ნიშანი ზარების ისტორიაში შეინახება.

კიდევ ერთი სიახლეა „ექსპრესიული სუბტიტრები“, რომელიც ვიდეო შეტყობინებებსა თუ სოციალურ ქსელებში გამოქვეყნებულ ვიდეოებში მეტყველების ემოციას გადმოსცემს ისეთი ტეგებით, როგორიცაა [სევდიანი] ან [მხიარული]. ეს მომხმარებლებს საშუალებას მისცემს, უხმოდ ყურებისასაც სრულად გაიგონ ნათქვამის კონტექსტი. კომპანიამ ასევე გაამარტივა არასასურველი ჯგუფური ჩათების აღმოჩენა და დატოვება. თუ უცნობი ნომერი მომხმარებელს ჯგუფში დაამატებს, ის მიიღებს შეტყობინებას ჯგუფის შესახებ ძირითადი ინფორმაციით და შეეძლება სწრაფად უპასუხოს, დატოვოს ჩათი, ან დაბლოკოს და დაარეპორტოს ნომერი.

Chrome-ის ბრაუზერში ჩამაგრებული ჩანართები (Pinned tabs) ახლა ისევე იმუშავებს, როგორც დესკტოპ ვერსიაში, რაც ნიშნავს, რომ გვერდები ბრაუზერის დასაწყისში შენახული დარჩება. განახლდა Circle to Search ფუნქციაც, რომელიც ეკრანზე ნებისმიერი ობიექტის მონიშვნით ძიების საშუალებას იძლევა. ახლა მისი გამოყენებით საეჭვო შეტყობინებების ანალიზიც იქნება შესაძლებელი — ფუნქციის გააქტიურების შემდეგ, ხელოვნური ინტელექტი შეაფასებს, რამდენად სავარაუდოა, რომ შეტყობინება თაღლითურია.

მნიშვნელოვანი სიახლეებია ხელმისაწვდომობის მიმართულებითაც. TalkBack-ის მომხმარებლებისთვის Gboard-ში ხმოვანი კარნახის დაწყება ორი თითით ორმაგი შეხებით იქნება შესაძლებელი. ამის შემდეგ, Gemini-ზე დაფუძნებული „ჭკვიანი კარნახი“ ტექსტის ბუნებრივი ბრძანებებით რედაქტირების საშუალებას იძლევა, მაგალითად, „შეცვალე ორშაბათი სამშაბათით“ ან „დაამოკლე“.

Pixel-ის კამერის აპლიკაციაში გაუმჯობესდა „მართვადი კადრის“ (Guided Frame) ფუნქცია. თუ აქამდე ის მხოლოდ კადრში სახის არსებობას გატყობინებდათ, ახლა ის უფრო დეტალურ აღწერას მოგაწვდით, მაგალითად: „ერთი გოგონა ყვითელი მაისურით ზის დივანზე და უყურებს ძაღლს“. ამასთან, Voice Access-ის გასააქტიურებლად ტელეფონზე ფიზიკური შეხება საჭირო აღარ არის — საკმარისია ბრძანება „Hey Google, start Voice Access“.

დაბოლოს, Google-მა სმენის აპარატებისთვის Fast Pair ფუნქცია დანერგა. პირველ ეტაპზე ის დანიური კომპანია Demant-ის ბრენდების (Oticon, Sonic, Bernafon) აპარატებთან იქნება თავსებადი. Android 16-ის განახლებების გავრცელება შესაბამის Pixel მოწყობილობებზე სამშაბათიდან დაიწყო.