„ბრძოლა გადარჩენისთვის“: Ford-ი და Renault ევროპაში ჩინურ კონკურენციასთან გასამკლავებლად ერთიანდებიან

Ford-ის აღმასრულებელმა დირექტორმა, ჯიმ ფარლიმ, აღიარა, რომ ავტომწარმოებელი „ინდუსტრიაში გადარჩენისთვის იბრძვის“, რადგან ევროპაში ჩინელი კონკურენტების მხრიდან მზარდი წნეხის ფონზე კონკურენტუნარიანობის შენარჩუნებას ცდილობს. ამ საფრთხეებთან ბრძოლის ერთ-ერთი მთავარი იარაღი ფრანგულ ავტომწარმოებელ Renault Group-თან პარტნიორობაა.

სამშაბათს, ორმა კომპანიამ გამოაცხადა შეთანხმება, რომლის მიხედვითაც 2028 წელს ევროპულ ბაზარზე Ford-ის ბრენდის ქვეშ ორი ხელმისაწვდომი ელექტრომობილი გამოვა. ამ პროექტში Ford-ი დიზაინზე იქნება პასუხისმგებელი, ხოლო Renault მანქანებს ჩრდილოეთ საფრანგეთში მდებარე თავის ქარხანაში ააწყობს. ახალი მოდელები Renault-ს ტექნოლოგიურ პლატფორმაზე, Ampere-ზე, აიგება.

კომპანიები ასევე შეთანხმდნენ, რომ „შეისწავლიან“ მსუბუქი კომერციული მანქანების ერთობლივი წარმოების შესაძლებლობას. ეს პარტნიორობა Ford-ის მიერ აღწერილი „ევროპული ტრანსფორმაციის“ შემდეგი ფაზის ნაწილია. გეგმა მიზნად ისახავს ამერიკული ავტომწარმოებლის უფრო მოქნილ და ხარჯეფექტიან კომპანიად ქცევას ბაზარზე, რომელიც სავსეა ისეთი ჩინური კომპანიების იაფი ავტომობილებით, როგორებიცაა BYD და SAIC Motor.

„როგორც ამერიკული კომპანია, ჩვენ ევროპას ჩვენი ინდუსტრიის გლობალური ტრანსფორმაციის წინა ხაზად აღვიქვამთ“, - განაცხადა ფარლიმ. „ის, თუ როგორ გავუწევთ აქ კონკურენციას, როგორ დავნერგავთ ინოვაციებს, ვითანამშრომლებთ და განვახორციელებთ ინვესტიციებს, მომავალი თაობის სამოქმედო გეგმას განსაზღვრავს. ჩვენ ევროპაში დინამიური მომავლის ერთგულები ვართ, მაგრამ ეს მომავალი ჩვენგან მოითხოვს უფრო მეტი სისწრაფითა და ეფექტიანობით მოქმედებას, ვიდრე ოდესმე“.