DoorDash-ი საკუთარ დრონებს ქმნის: კომპანია ავტონომიური მიტანის სერვისს აფართოებს

DoorDash-ი დრონებით მიტანის საკუთარ ბიზნესს ავითარებს, რაც მოიცავს საკუთარი საფრენი აპარატების შექმნასაც. პროექტი კომპანიის რობოტიზაციისა და ავტონომიური სისტემების გუნდის მიერ მომზადდა და საბოლოო ჯამში, ის DoorDash-ის მიტანის ძირითად აპლიკაციაში იქნება ინტეგრირებული.

კომპანიამ ახალი მიმართულება, სახელწოდებით DoorDash Air, მას შემდეგ წარადგინა, რაც აშშ-ის ფედერალური ავიაციის ადმინისტრაციისგან (FAA) Part 135 საჰაერო გადამზიდის სერტიფიკატი მიიღო. აღნიშნული ლიცენზია კომპანიას საშუალებას აძლევს, ლეგალურად განახორციელოს დრონებით კომერციული მიტანის სერვისი ამერიკის შეერთებული შტატების ტერიტორიაზე.

მიუხედავად სერტიფიკატის მიღებისა, ეს არ ნიშნავს, რომ DoorDash-ის მიერ შექმნილი დრონები შეკვეთების მიტანას ხვალვე ან მომდევნო თვეში დაიწყებენ. კომპანიას ჯერჯერობით არ გამოუქვეყნებია დეტალური განრიგი იმისა, თუ როდის ჩაეშვება აპარატები სრულფასოვან ექსპლუატაციაში. სავარაუდოა, რომ პროცესი დაიწყება შეზღუდული საპილოტე პროგრამებით, რომელთა ფარგლებშიც უპილოტო საფრენი აპარატები მცირე დისტანციებზე, ოპერატორის მხედველობის არეში იფრენენ.

ტექნოლოგიური გამოწვევები და პარტნიორობა

იმისათვის, რომ DoorDash-ის დრონებმა ავტონომიურად, დიდ დისტანციებზე ფრენა შეძლონ, კომპანიას დასჭირდება FAA-სგან BVLOS (Beyond Visual Line of Sight - მხედველობის არეალს მიღმა ფრენა) ტექნოლოგიის გამოყენების ნებართვა. მსგავსი სერტიფიკატი ბოლო წლებში უკვე მიიღეს ისეთმა კომპანიებმა, როგორიცაა Amazon, Wing და Zipline.

საკუთარი პროგრამის განვითარების პარალელურად, საკვებისა და პროდუქტების მიტანის სერვისი ინარჩუნებს არსებულ პარტნიორობას Wing-თან და Flytrex-თან. DoorDash-მა Alphabet-ის მფლობელობაში არსებულ Wing-თან თანამშრომლობა 2022 წელს ავსტრალიაში დაიწყო, მოგვიანებით კი, 2024 წელს, პარტნიორობა აშშ-ის რამდენიმე ქალაქზე, მათ შორის დალას-ფორტ-უორტზეც გავრცელდა.

DoorDash Labs და ავტონომიური რობოტები

DoorDash Air შეიქმნა DoorDash Labs-ის ბაზაზე — ეს არის კვლევისა და განვითარების (R&D) გუნდი, რომელმაც შექმნა Dot, ტროტუარებზე მოძრავი ავტონომიური რობოტი. Dot-ის პრეზენტაცია 2025 წლის სექტემბერში შედგა და ის ამჟამად უკვე მუშაობს არიზონას შტატის რამდენიმე გარეუბანში (ტემპე, მესა, გილბერტი და ჩენდლერი), ასევე კალიფორნიაში, ქალაქ ფრიმონტში.

ერთი შეხედვით, ტროტუარის რობოტებისა და დრონების წარმოება სცილდება კომპანიის ძირითად ბიზნესმოდელს, რომელიც რესტორნებისა და მომხმარებლების კურიერებთან დაკავშირებას გულისხმობს. თუმცა, DoorDash-ის თანადამფუძნებელი და პროდუქტების მიმართულების ხელმძღვანელი, სტენლი ტანგი მიიჩნევს, რომ ამ ყველაფერს ერთი საერთო მიზანი აქვს.

„ჩვენ არ დაგვიწყია კითხვით: 'რა არის ყველაზე მაგარი ავტონომიური ტექნოლოგია, რაც შეგვიძლია შევქმნათ?'. ჩვენ დავიწყეთ ფუნდამენტური პრინციპით: რა არის მომხმარებლის რეალური პრობლემა, რომელიც გადაჭრას საჭიროებს?“ - განაცხადა ტანგმა DoorDash Air-ის წარდგენისას.

ერთიანი ოპერაციული სისტემა

კომპანიის ხედვით, დრონები და ტროტუარის რობოტები იმ ფართო მიტანის ქსელის ნაწილია, რომელსაც DoorDash-ი აშენებს. ფიზიკური აპარატურა — იქნება ეს 160 კილოგრამიანი რობოტი თუ დრონი — მნიშვნელოვანია, თუმცა ტანგი ხაზს უსვამს ოპერაციული სისტემის კრიტიკულ როლს. კერძოდ, პროგრამულ უზრუნველყოფას უნდა შეეძლოს ზუსტად განსაზღვროს, მიტანის რომელი მეთოდია საუკეთესო კონკრეტული შეკვეთისთვის.

DoorDash Labs-მა უკვე შექმნა პროგრამული უზრუნველყოფა, სახელწოდებით Autonomous Delivery Platform, რომელიც კოორდინაციას უწევს ამ პროცესებს. ეს სისტემა მუშაობს Dot-თან, ადამიან კურიერებთან და მალე დრონებთანაც. კომპანია მუშაობს გამოწვევების სრულ სპექტრზე:

• აპარატურული უზრუნველყოფა და ჩაშენებული სისტემები;
• მარშრუტიზაციის ალგორითმები;
• რეალურ დროში გადაწყვეტილების მიღება: ვინ უნდა მიიტანოს შეკვეთა — ადამიანმა, დრონმა თუ რობოტმა.

სტენლი ტანგმა ეს სირთულე საინჟინრო კადრების მოსაზიდადაც გამოიყენა და აღნიშნა, რომ ავტონომიური სისტემების მწარმოებელი კომპანიების უმეტესობა მხოლოდ ერთ შრეზე მუშაობს, DoorDash-ში კი ინჟინრებს ყველა ამ სისტემის ერთიან ქსელში მართვა უწევთ. მისი თქმით, სწორედ DoorDash-ში წყდება დღეს ავტონომიურობასთან დაკავშირებული ყველაზე საინტერესო ამოცანები.