გერმანიის სასამართლომ OpenAI საავტორო უფლებების დარღვევაში დამნაშავედ ცნო და კომპენსაციის გადახდა დააკისრა

გერმანიის სასამართლომ დაადგინა, რომ კომპანია OpenAI-მ თავისი ენობრივი მოდელის, ChatGPT-ის ტრენინგისას ქვეყნის საავტორო უფლებების კანონმდებლობა დაარღვია. გადაწყვეტილების მიზეზი ლიცენზირებული მუსიკალური ნაწარმოებების უნებართვოდ გამოყენება გახდა, რის შესახებაც ინფორმაციას რამდენიმე მედიასაშუალება, მათ შორის The Guardian-ი ავრცელებს.

სასამართლო პროცესი გასული წლის ნოემბერში GEMA-ს მიერ შეტანილი სარჩელის საფუძველზე დაიწყო. GEMA არის ორგანიზაცია, რომელიც გერმანიაში მუსიკალურ უფლებებს განკარგავს. სასამართლომ OpenAI-ს GEMA-სთვის კომპენსაციის გადახდა დააკისრა, რომლის ოდენობა არ სახელდება.

OpenAI-ში სასამართლოს გადაწყვეტილებას არ ეთანხმებიან და აცხადებენ, რომ „შემდგომ ნაბიჯებს განიხილავენ“. საპირისპიროდ, GEMA-მ ამ გადაწყვეტილებას „პირველი ისტორიული პრეცედენტი უწოდა ხელოვნური ინტელექტის სფეროში ევროპაში“.

„დღეს ჩვენ შევქმენით პრეცედენტი, რომელიც იცავს და განმარტავს ავტორთა უფლებებს: ხელოვნური ინტელექტის ინსტრუმენტების ოპერატორებმაც კი, როგორიცაა ChatGPT, უნდა დაიცვან საავტორო უფლებების კანონი“, — განაცხადა GEMA-ს აღმასრულებელმა დირექტორმა, ტობიას ჰოლცმიულერმა, The Guardian-ის ცნობით. „დღეს ჩვენ წარმატებით დავიცავით მუსიკის შემქმნელთა საარსებო წყარო“.

აღსანიშნავია, რომ OpenAI-ს ანალოგიური ბრალდებებით სხვა შემოქმედებითი ჯგუფები და მედიაორგანიზაციებიც უჩივიან, რაც ამ კონკრეტული გადაწყვეტილების მნიშვნელობას კიდევ უფრო ზრდის.