OpenAI-მ ChatGPT-ის „ტირეს პრობლემა“ მოაგვარა, რომელიც AI-გენერირებული ტექსტის ნიშნად იქცა

კომპანია OpenAI-მ განაცხადა, რომ ChatGPT-ი მომხმარებლის მითითების შემთხვევაში გრძელი ტირეს (em dash) გამოყენებას შეწყვეტს. ეს სასვენი ნიშანი ბოლო თვეებში ხელოვნური ინტელექტის მიერ დაწერილი ტექსტის ერთგვარ ამოსაცნობ ნიშნად იქცა და ყველგან ჩნდებოდა — სასკოლო ნაშრომებში, ელექტრონულ წერილებში, კომენტარებში, LinkedIn-ის პოსტებსა თუ სარეკლამო მასალებში.

გრძელი ტირეს ასეთი გახშირების გამო, ბევრი მომხმარებელი კრიტიკის ობიექტი გახდა. მათ ადანაშაულებდნენ სიზარმაცესა და იმაში, რომ საკუთარი სამუშაოს შესასრულებლად AI ჩატბოტს მიმართავდნენ. რა თქმა უნდა, არსებობდა საპირისპირო არგუმენტიც — ბევრი ამტკიცებდა, რომ ამ სასვენ ნიშანს დიდი ხნით ადრე იყენებდა, ვიდრე ის ენობრივ მოდელებში პოპულარული გახდებოდა.

მიუხედავად ამისა, ფაქტი, რომ ჩატბოტები მის გამოყენებას ვერ არიდებდნენ თავს, ე.წ. „ChatGPT-ის ტირე“ ნებისმიერ ტექსტში არასასურველ დამატებად აქცია. ეს მაშინაც კი პრობლემური იყო, თუკი ტექსტის ავტორს ხელოვნური ინტელექტი არ გამოუყენებია, რადგან ტირე გენერირებული კონტენტის სანდო ნიშნად მაინც არ ითვლებოდა.

ეს პრობლემა OpenAI-სთვის გარკვეული დროის განმავლობაში გადაუჭრელი იყო. ChatGPT-ის მომხმარებლები ჩატბოტს ვერ აიძულებდნენ, შეეწყვიტა ამ სიმბოლოს გამოყენება, მაშინაც კი, როდესაც ამას პირდაპირ სთხოვდნენ. ახლა კი, OpenAI-ის აღმასრულებელი დირექტორი, სემ ალტმანი, აცხადებს, რომ კომპანიამ პრობლემა მოაგვარა.

სოციალურ ქსელ X-ზე გამოქვეყნებულ პოსტში ალტმანი წერს: „თუ ChatGPT-ის პერსონალურ ინსტრუქციებში ეტყვით, რომ არ გამოიყენოს გრძელი ტირე, ის საბოლოოდ აკეთებს იმას, რასაც უნდა აკეთებდეს“. მან ამ განახლებას „პატარა, მაგრამ სასიხარულო გამარჯვება“ უწოდა.

კომპანიამ დამატებითი განმარტება Threads-ზე გამოაქვეყნა, სადაც იუმორით ChatGPT-ის „მოაბოდიშებინა“ გრძელი ტირეს „გაფუჭებისთვის“. განცხადების თანახმად, ჩატბოტი უკეთესად შეასრულებს მითითებას, თუ მომხმარებელი ამას პერსონალიზაციის პარამეტრებში, „პერსონალური ინსტრუქციების“ გრაფაში მიუთითებს. ეს ნიშნავს, რომ მოდელი ავტომატურად არ ამოიღებს ტირეს თავისი პასუხებიდან, თუმცა მომხმარებლებს მისი გამოყენების სიხშირეზე მეტი კონტროლი ექნებათ.