OpenAI მასშტაბურ გაფართოებას აგრძელებს: კომპანიამ Amazon-თან 38 მილიარდი დოლარის ხელშეკრულება გააფორმა

ChatGPT-ის შემქმნელი კომპანია OpenAI არ ჩერდება და ხელოვნური ინტელექტის ინფრასტრუქტურის გაძლიერებას განაგრძობს, რომელიც მასშტაბური ამოცანების შესასრულებლად სჭირდება. ორშაბათს ცნობილი გახდა, რომ კომპანიამ Amazon-თან გარიგებას მიაღწია, რომლის ფარგლებშიც მომდევნო შვიდი წლის განმავლობაში 38 მილიარდი დოლარის ღირებულების ღრუბლოვან გამოთვლით სერვისებს შეიძენს.

OpenAI-ის განცხადებით, ისინი დაუყოვნებლივ დაიწყებენ Amazon Web Services-ის (AWS) გამოთვლითი სიმძლავრეების გამოყენებას. დაგეგმილია, რომ სრული მოცულობა 2026 წლის ბოლომდე იქნება ათვისებული, შემდგომი გაფართოების შესაძლებლობით 2027 წელსა და მის შემდგომ პერიოდში.

ეს შეთანხმება OpenAI-ის გასულ კვირას განხორციელებულ რესტრუქტურიზაციას მოჰყვა. ამ ცვლილების შედეგად, კომპანია გათავისუფლდა ვალდებულებისგან, მიეღო Microsoft-ის თანხმობა სხვა კომპანიებისგან გამოთვლითი სერვისების შესაძენად.

Amazon-თან დადებული გარიგება OpenAI-ის უფრო დიდი მისიის ნაწილია, რომელიც გამოთვლითი სიმძლავრეების ზრდას ისახავს მიზნად და მომდევნო ათწლეულის განმავლობაში ტრილიონ დოლარზე მეტის დახარჯვას გულისხმობს. კომპანიას უკვე აქვს დაანონსებული ახალი მონაცემთა ცენტრების მშენებლობა Oracle-თან, SoftBank-თან, არაბთა გაერთიანებულ საამიროებთან და სხვებთან ერთად, ასევე უზრუნველყოფილი აქვს გარიგებები ჩიპების მწარმოებლებთან, როგორებიცაა Nvidia, AMD და Broadcom.

ზოგიერთი ანალიტიკოსისთვის, OpenAI-სა და სხვა ტექნოლოგიური გიგანტების მხრიდან გაზრდილი ინვესტიციები მიანიშნებს, რომ ინდუსტრია „ხელოვნური ინტელექტის ბუშტისკენ“ მიემართება. მათი შეშფოთების საგანია ის, რომ უზარმაზარი თანხები იხარჯება ჯერ კიდევ დაუმტკიცებელ და პოტენციურად საშიშ ტექნოლოგიაში, რომელსაც ინვესტიციის მნიშვნელოვანი უკუგების ნათელი პერსპექტივა არ გააჩნია.