OpenAI მათემატიკოსთა საკონსულტაციო ჯგუფს ქმნის: AI-მ 100-ზე მეტი რთული ამოცანა ამოხსნა

ორშაბათს OpenAI-მ ახალი დამოუკიდებელი საკონსულტაციო ჯგუფის ჩამოყალიბების შესახებ გამოაცხადა, რომელიც ნიუ-ჯერსის შტატში, პრინსტონის პერსპექტიული კვლევების ინსტიტუტში (IAS) განთავსდება. „მათემატიკისა და ხელოვნური ინტელექტის საკონსულტაციო ჯგუფის“ (Advisory Group on Mathematics and Artificial Intelligence) მიზანია, მათემატიკოსებს მეტი შესაძლებლობა მისცეს, ჩაერთონ კომპანიის მათემატიკურ კვლევებში.

როგორც ოფიციალურ განცხადებაშია ნათქვამი, ეს ჯგუფი ერთგვარი ხიდი იქნება მათემატიკურ საზოგადოებასა და ფართო პუბლიკას შორის, რაც მეცნიერებს საშუალებას მისცემს, საკუთარი პოზიცია დააფიქსირონ ტექნოლოგიების განვითარების პროცესში. აღნიშნული გადაწყვეტილება მოჰყვა ნავიე-სტოქსის ათასწლეულის პრიზის პრობლემის (Navier-Stokes Millennium Prize problem) გადაჭრის შესახებ მოულოდნელ პუბლიკაციას.

ახალი ჯგუფის წარდგენისას OpenAI-მ ასევე განაცხადა, რომ მათმა შიდა მოდელმა მათემატიკის თითქმის ყველა სფეროში 100-ზე მეტი დამატებითი ღია პრობლემა გადაჭრა. თუმცა, ბევრი ცნობილი მათემატიკოსი შეშფოთებულია ასეთი სწრაფი ტემპით. მიმდინარე თვის დასაწყისში, ფილდსის პრემიის ლაურეატმა 25-მა მათემატიკოსმა ღია წერილს მოაწერა ხელი, სადაც აღნიშნულია, რომ ხელოვნური ინტელექტის ლაბორატორიები საფრთხეს უქმნიან მათ ინტელექტუალურ საქმიანობას ცნობილი მათემატიკური ამოცანების ამოხსნისთვის გამართულ რბოლაში.

ჯგუფის ფუნქციები და დამოუკიდებლობა

OpenAI-ს ახალი ჯგუფი ძირითადად საკონსულტაციო ფუნქციას შეასრულებს. მისი წევრები შეაფასებენ ახალი შედეგების მნიშვნელობას და კოორდინაციას გაუწევენ მათ გამოქვეყნებას. მიუხედავად იმისა, რომ ჯგუფის წევრები ანაზღაურებას არ მიიღებენ, მათ აქვთ უფლება გასცენ დამოუკიდებელი რჩევები, საჯაროდ გამოხატონ თავიანთი მოსაზრებები და თავად მართონ ჯგუფის წევრობის საკითხები, რაც მათ კომპანიისგან გარკვეულ დამოუკიდებლობას ანიჭებს.

თუმცა, ჯგუფს არ ექნება უფლება შეანელოს ან შეცვალოს OpenAI-ს მიმდინარე მათემატიკური კვლევების მიმართულება. როგორც ბლოგპოსტშია აღნიშნული, „ჯგუფი არ იქნება პასუხისმგებელი იმაზე, თუ რა ტემპით წარიმართება კომპანიის შიდა პროგრესი მათემატიკის მიმართულებით“.

პერსპექტიული კვლევების ინსტიტუტმა (IAS) საკუთარ განცხადებაში ხაზი გაუსვა ამ გარემოებას. „მიუხედავად იმისა, რომ ჩვენ გავცემთ რჩევებს, არ ვფლობთ გადაწყვეტილების მიღების ძალაუფლებას არცერთ AI კომპანიაში. ნებისმიერი კომპანიის მიერ მიღებულ გადაწყვეტილებებზე პასუხისმგებლობა თავად ამ კომპანიას ეკისრება“, — ნათქვამია ინსტიტუტის პრესრელიზში.

ჯგუფის საწყის შემადგენლობაში ცხრა ცნობილი მათემატიკოსი დასახელდა. აღსანიშნავია, რომ მათგან მხოლოდ ერთმა — IAS-ის წარმომადგენელმა კამილო დე ლელისმა (Camillo De Lellis) — მოაწერა ხელი ფილდსის პრემიის ლაურეატების კრიტიკულ წერილს.