Tesla-ს Cybercab-ის ახალი დეტალები: რატომ არ დაიშვებიან ბავშვები და რა ხდება ავარიის დროს?

Tesla-ს Cybercab-ის პრეზენტაცია დასრულდა, თუმცა ღონისძიება კომპანიის ჩვეული სტილისგან რადიკალურად განსხვავებული აღმოჩნდა. ილონ მასკს ამ პროექტზე წლებია უმუშავია, თუმცა თავად პრეზენტაცია მოკლე იყო და მასკს სიტყვით გამოსვლაზე დიდი დრო არ დაუხარჯავს. Cybercab-ის მთავარი დაპირება სრულად ავტონომიური მართვაა, რომელიც მხოლოდ კამერებსა და ხელოვნურ ინტელექტს ეყრდნობა და მისი ღირებულება Waymo-ს სერვისზე გაცილებით ნაკლები იქნება.

კომპანიამ დეტალების ნაწილი ხუთშაბათს გამოქვეყნებულ PDF დოკუმენტებსა და „Robotaxi“ აპლიკაციის განახლებულ წესებში გაფანტა. დანარჩენი ინფორმაცია კი ერთგული გულშემატკივრების მიერ ინტერნეტში გავრცელებულ ცნობებს ეყრდნობა. ახლა Tesla-მ უნდა დაამტკიცოს, რომ ეს სატრანსპორტო საშუალებები უსაფრთხოა როგორც საზოგადოებისთვის, ისე ადგილობრივი მთავრობებისა და გზატკეცილების მოძრაობის უსაფრთხოების ეროვნული ადმინისტრაციისთვის (NHTSA), რომელმაც Cybercab-ის გამოშვებასთან დაკავშირებით გამოძიება უკვე დაიწყო.

ბავშვების მგზავრობის შეზღუდვა

ერთ-ერთი ყველაზე საინტერესო დეტალი, რომელიც Cybercab-ის დოკუმენტაციაში აღმოჩნდა, ასაკობრივ შეზღუდვას ეხება. ამ ეტაპზე, Tesla 13 წლამდე ასაკის ბავშვებს ავტომობილით მგზავრობას უკრძალავს. 8-დან 17 წლამდე მინორებს შეუძლიათ ისარგებლონ Tesla-ს „Robotaxi“ Model Y SUV-ებით, თუმცა ორივე შემთხვევაში 18 წლამდე პირებს თან უნდა ახლდეთ ზრდასრული.

აღსანიშნავია, რომ Cybercab-ს არ გააჩნია ბავშვის სავარძლებისთვის განკუთვნილი სტანდარტული LATCH სამაგრები. სავარძლის დამაგრება მხოლოდ უსაფრთხოების ღვედის მეშვეობითაა შესაძლებელი. კომპანიის ხელმძღვანელობა ხშირად საუბრობს ხარჯების შემცირების მიზნით ზედმეტი დეტალების ამოღებაზე, რაც, როგორც ჩანს, ბავშვის სავარძლის სამაგრებსაც შეეხო.

რა ხდება ავარიის დროს?

მიუხედავად იმისა, რომ ავტონომიური მართვის მიზანი შეჯახებების თავიდან აცილებაა, ავარიის შემთხვევაში Cybercab-ში აქტიურდება უსაფრთხოების შემდეგი პროტოკოლი:

• იხსნება უსაფრთხოების ბალიშები;
• ავტომატურად იხსნება კარების საკეტები;
• ირთვება საავარიო და შიდა განათება;
• ითიშება მაღალი ძაბვის ბატარეა;
• ფანჯრები გადადის ვენტილაციის რეჟიმში;
• ავტომობილი ააქტიურებს მუხრუჭებს სრულ გაჩერებამდე და პარკირების რეჟიმში გადასვლამდე;
• საინფორმაციო-გასართობი სისტემა ამყარებს ორმხრივ კავშირს Tesla-ს მხარდაჭერის გუნდთან.

კარების ავტომატური განბლოკვა მნიშვნელოვანი სიახლეა, რადგან Tesla-ს ელექტრონული საკეტები ადრე კრიტიკის საგანი გამხდარა, განსაკუთრებით იმ შემთხვევებში, როდესაც ავარიის შემდეგ მგზავრები ავტომობილიდან გამოსვლას ვერ ახერხებდნენ.

კარების მექანიკური გაღება

კიდევ ერთი კრიტიკა, რომელიც Tesla-ს მისამართით ისმოდა, საგანგებო სიტუაციებში კარების მექანიკური სახელურების პოვნის სირთულეს ეხებოდა. Cybercab-ში ეს პრობლემა მოგვარებულია: მექანიკური სახელური თვალსაჩინო ადგილას, თითოეული კარის საყრდენზეა განთავსებული. ავტომობილის გარედან გასაღებად კი მცირე ზომის ღილაკია გათვალისწინებული, რაც ელექტრონულ საკეტებს მგზავრობის დასაწყისში ან ბოლოს კარის ავტომატურად გაღების საშუალებას აძლევს.

Brake-by-wire სისტემა

Tesla Cybercab-ში იყენებს Brake-by-wire სისტემას, რაც ხარჯების დაზოგვისა და კონსტრუქციის გამარტივების კიდევ ერთი მცდელობაა. ტრადიციული ჰიდრავლიკური სისტემის ნაცვლად, აქ მუხრუჭებს ელექტრონული ამძრავები (actuators) აკონტროლებენ. ილონ მასკის განმარტებით, ელექტრონული მუხრუჭები გამორიცხავს ჰიდრავლიკური სისტემის სირთულეს და ავტომობილში მილების გაყვანის საჭიროებას. კომპანიამ მსგავსი ტექნოლოგია (steer-by-wire) უკვე გამოიყენა Cybertruck-ში, სადაც საჭესა და თვლებს შორის ფიზიკური კავშირი გაუქმებულია.

ფანჯრები და USB-C პორტები

დოკუმენტაციის თანახმად, Cybercab-ის ფანჯრები ამ ეტაპზე ბოლომდე არ იხსნება, თუმცა მიზეზი დაკონკრეტებული არ არის. რაც შეეხება ტექნოლოგიურ აღჭურვილობას, ავტომობილში დამონტაჟებულია 90W სიმძლავრის USB-C პორტები, რაც სტანდარტულ ავტომობილებთან შედარებით დაახლოებით ოთხჯერ მეტ ენერგიას იძლევა.