Uber-ის ახალი ფუნქცია: ნივთების მაღაზიაში დაბრუნება უკვე სახლიდან გაუსვლელადაა შესაძლებელი

Uber-მა პარასკევს ახალი ფუნქცია წარადგინა, რომელიც მომხმარებლებს საშუალებას აძლევს, შეძენილი ნივთები მაღაზიაში სახლიდან გაუსვლელად დააბრუნონ. Uber Eats-ის აპლიკაციაში ინტეგრირებული ეს სიახლე კომპანიის მორიგი მცდელობაა, გაზარდოს პლატფორმის გამოყენების ინტენსივობა და მომხმარებლები ძირითადი სერვისების — მგზავრობისა და საკვების მიტანის — მიღმა სხვა მომსახურებებითაც დააინტერესოს.

მომსახურებას გარკვეული შეზღუდვები ახლავს და, რა თქმა უნდა, კურიერის საფასურის გადახდასაც ითვალისწინებს. Uber-ის განმარტებით, დაბრუნების ღირებულება კურიერის მიერ დახარჯული დროისა და მანძილის მიხედვით გამოითვლება. მომხმარებლებს მხოლოდ Uber Eats-ის მეშვეობით შეძენილი იმ ნივთების დაბრუნება შეუძლიათ, რომლებიც ექვემდებარება უკან დაბრუნების პოლიტიკას, ამასთანავე, აუცილებელია კონკრეტული მაღაზიის წესების დაცვა.

პარტნიორ მაღაზიებს შორის არიან At Home, Best Buy, Dick’s Sporting Goods, GNC, Michael’s Pet Food Express, Pacsun, Petco და Target. კომპანიაში აცხადებენ, რომ მომავალში ჩამონათვალს სხვა რითეილერებიც დაემატება. გარდა ამისა, დაწესებულია საფასო ლიმიტიც: სერვისით სარგებლობა შესაძლებელია მხოლოდ იმ ნივთებზე, რომელთა ღირებულებაც 20 დოლარს აღემატება.

როგორ გამოვიყენოთ ნივთის დაბრუნების ფუნქცია

ახალი ფუნქციით სარგებლობისთვის მომხმარებლებმა უნდა შეასრულონ შემდეგი ნაბიჯები:

1. გადადით აპლიკაციაში შეკვეთების ისტორიის (order history) განყოფილებაში.
2. დააჭირეთ ღილაკს „ნივთის დაბრუნება“ (Return an item).
3. აირჩიეთ სასურველი ნივთი ჩამონათვალიდან.
4. პროცესის დასასრულებლად აირჩიეთ ოფცია „დაბრუნება კურიერის მეშვეობით“ (Return with a courier).

ზოგიერთი მომხმარებლისთვის ეს სერვისი განსაკუთრებით მიმზიდველი იქნება თანხის მყისიერი დაბრუნების შესაძლებლობისა და იმ დამღლელი პროცედურების თავიდან არიდების გამო, რასაც მაღაზიაში წასვლა, პარკირების ადგილის ძებნა და რიგში დგომა ჰქვია.

Uber-ის ექსპერიმენტები ტრადიციული სერვისების მიღმა

მიუხედავად იმისა, რომ Uber-ს რითეილ-დაბრუნებების სფეროში აქამდე გამოცდილება არ ჰქონია, კომპანიას წარსულში არაერთი ფუნქცია დაუნერგავს, რომელიც სცილდება მგზავრობისა და საკვების მიტანის სტანდარტულ ჩარჩოებს. 2020 წელს ამოქმედდა სერვისი Connect, რომელიც ამანათების მეგობრებისთვის, ოჯახის წევრებისთვის ან კოლეგებისთვის გადაცემას უზრუნველყოფდა.

ასევე შეიქმნა Uber Direct, რომელიც მომხმარებლებს საშუალებას აძლევდა, შერჩეული მაღაზიებიდან გამოეწერათ პროდუქცია და მიეღოთ ის პირდაპირ კართან, ყოველგვარი კონტაქტის გარეშე — რაც იმ პერიოდში გავრცელებული COVID-19-ის პანდემიის საპასუხო რეაქცია იყო. 2023 წელს Uber Connect-ი კიდევ უფრო გაფართოვდა ფუნქციით „ამანათის დაბრუნება“ (Return a Package), რომლის მეშვეობითაც მომხმარებელს შეუძლია დაიქირაოს კურიერი ხუთამდე ამანათის ერთდროულად გადასატანად ფოსტაში, UPS-ის ან FedEx-ის ფილიალებში.